DK SHEIN AENDA FALME ZA KIARABU KWA ZIARA YA WIKI MOJA

Dk Shein

Rais wa Zanzibar na Mwenyekiti wa Baraza la Mapinduzi, Dk Ali Mohamed Shein, anaondoka nchini leo kuelekea Falme za Kiarabu (UAE) kwa ziara ya wiki moja.

Kwa mujibu wa Taarifa tulizozipata kutoka Ikulu Zanzibar zinaeleza kuwa, katika ziara yake hiyo Dk. Shein atafuatana na Mkewe Mama Mwanamwema Shein pamoja na Waziri wa Kazi Uwezeshaji Wananchi Kiuchumi na Ushirika Mhe. Haroun Ali Suleiman na Waziri wa Biashara, Viwanda na Masoko Mhe. Nassor Ahmed Mazurui,

Wengine ni Naibu Waziri wa Mambo ya Nje na Ushirikiano wa Kimataifa wa Jamhuri ya Muungano wa Tanzania Mhe. Mahadhi Juma Maalim, Mshauri wa Rais Uhusiano wa Kimataifa na Uwekezaji Mhe. Balozi Mohammed Ramia, Mkurugenzi Mtendaji Mamlaka ya Uwekezaji Vitega Uchumi Zanzibar Salum Khamis Nassor pamoja na watendaji wengine wa serikali.

Katika ziara yake hiyo Mhe. Rais Dk. Shein anatarajia kukutana na viongozi mbali mbali pamoja na wafanyabiashara, wenyeviwanda na wawekezaji, miongoni mwa viongozi atakaokutana nao ni Kiongozi wa Ras-Al-Khaiman Sheikh Saud bin Saqr Al-Qasimi, Kiongozi wa Sharja Sheikh Sultan Mohammed Al-Qasimi na viongozi wengineo.

Aidha, Dk. Shein atatembelea maeneo mbali mbali ya Viwanda, Bandari pamoja na maeneo ya Kihistoria.

IMETOLEWA NA HABARI MAELEZO ZANZIBAR

10/11/2011