CHADEMA IPO SIKU WANCHI WATACHOKA FITNA

Mwenyekiti wa CHADEMA, Freeman Mbowe

Tangu uchaguzi wa Meya ulipofanyika Arusha na Chadema kuususia, siasa za jiji hilo zimebaki kuwa ni tete na  pengine ndio maana kila inapotokea sababu basi wale wanaohisi kwamba walionewa wanapata mwanya wa kupenyezea hisia zao.

Vurugu za hivi majuzi zilizoelezewa kwamba zinatokana na kile viongozi wa Chadema walichodai kwamba ni manyanyaso ya muda mrefu kutoka kwenye vyombo vya dola ikiwamo polisi na mahakama ni kielelezo tosha cha haya ninayoyasema.

Kabla ya polisi kuwafurumusha pale kwenye viwanja vya NMC, wao walidai kwamba wangekesha pale kwa siku tatu mfululizo kushinikiza mbunge wao Godbless Lema atolewe rumande.

Hata hivyo polisi  hawakukubaliana na hali hiyo na yalitokea yaliyotokea ambapo takribani watu 30 wakiwemo viongozi wa ngazi za juu wa chama hicho walikamatwa na kufunguliwa mashtaka.

Baadae, Waziri Mkuu, Mizengo Pinda alizungumza, akasema kwamba suala la Arusha limekosa ufumbuzi kwa kuwa Chadema hawaonyeshi utashi wa kisiasa wa kulimaliza. Wao Chadema kwa upande wao nao wakadai kwamba upande wa pili ndio hautaki kulimaliza.

Lakini kimsingi walio wengi wangekubali kwamba vurugu zile hazikuwa na umuhimu kwa kuwa  Mhe Lema alipewa nafasi ya kupata dhamana lakini akakataa mwenyewe na alipo omba tena akapangiwa tarehe 14 Novemba (Kesho) kwamba afike mahakamani na wadhamini wawili.

Kwanini Chadema walilazimisha kwamba Mahakama imtoe Lema siku ile walio taka wao? Mbona mahakama haikumlazimisha Lema atoke siku ile alipokataa kutoka?  

Kuna mambo ambayo wakati mwingine yanaleta utata, utata haswa kwenye malengo wanayokuwa nayo wanasiasa wakati wanapotaka kufanya mambo yao, wanaandaa mazingira ya kuungwa mkono hata kwa mambo yasiyokuwa na msingi.

Sasa cha ajabu ni kwamba baada ya kuwachochea watu, kuwapandisha munkari na viongozi kujitapa kwamba wapo tayari kufa kwa kutetea haki , mwisho wa siku viongozi hao hao wanasema kwamba suala la Arusha litamalizika kwa mazungumzo.

Kama kweli wanafahamu hivyo kwanini walifanya hayo waliyoyafanya? Kwanini baada ya kuwaingiza watu kwenye matatizo ndio kiongozi anasema kwamba ipo haja ya kufanya mazungumzo kuondoa tofauti kati ya pande mbili?

Hii ni ishara kwamba tangu mwanzo kuna kitu kilikwenda ndivyo sivyo. Lakini tutaendelea hivi mpaka lini? Nadhani imefika wakati sasa wanasiasa wawe na hoja za msingi za kusimamia la sivyo itafika wakati wananchi watachoshwa na siasa za fitna na matokea yake wapinzani wataonekana ni watu wa kuzua na waongo.

Katika nchi kama hii ambapo vyama vya upinzani vimekuwa na historia ya kupanda na kushuka kama mawimbi ya bahari, chama cha upinzani chenye nguvu kinatakiwa kufanya mambo kisayansi zaidi ili kiwe tofauti na wengine ambao wameshashuka.